इंडियन प्रीमियर लीग (IPL 2023) चा रोमांचक 16 वा हंगाम लवकरच संपणार आहे. भारतीय संघातील अनेक खेळाडूंनी संपूर्ण हंगाम खेळला आहे. तसेच, आयपीएलनंतर लगेचच भारतीय कसोटी संघाचे खेळाडू WTC फायनल खेळण्यासाठी एक एक करून लंडनला रवाना होत आहेत. दरम्यान, अफगाणिस्तानसोबतची मालिका रद्द करायची की नाही अशा बातम्या येत आहेत, पण अफगाणिस्तानसोबतची भारतातील मालिका रद्द करण्याऐवजी बीसीसीआय या मालिकेत आपला दुय्यम संघ उतरवण्याची शक्यता आहे. या मालिकेत विराट कोहली, रोहित शर्मासह भारतीय संघातील सर्व बड्या खेळाडूंना विश्रांती देण्यात येणार आहे.
अफगाणिस्तानविरुद्धची मालिका 20 ते 30 जून दरम्यान खेळवली जाण्याची शक्यता आहे. बीसीसीआय ही मालिका आणखी कमी करू शकते किंवा या मालिकेत फक्त टी-20 किंवा एकदिवसीय मालिका खेळवली जाऊ शकते. या मालिकेत हार्दिक पांड्याच्या नेतृत्वाखाली भारताचा दुसरा संघ खेळण्याची शक्यता आहे.
वेस्ट इंडिजविरुद्धच्या पूर्ण मालिकेपूर्वी बीसीसीआयला भारतीय संघातील वरिष्ठ खेळाडूंना विश्रांती द्यायची आहे. भारतीय संघ १२ जुलै ते १३ ऑगस्ट या कालावधीत वेस्ट इंडिजच्या दौऱ्यावर जाणार आहे. या दौऱ्यात भारतीय संघ दोन कसोटी, तीन एकदिवसीय आणि पाच टी-20 सामन्यांची मालिका खेळणार आहे.
यानंतर संघ तीन सामन्यांची टी-२० मालिका खेळण्यासाठी आयर्लंडला जाईल. आयपीएलच्या या मोसमात चांगली कामगिरी करणाऱ्या खेळाडूंना आयर्लंड दौऱ्यावर उतरवले जाण्याची शक्यता आहे. आशिया कप डोळ्यासमोर ठेवून या दौऱ्यात हार्दिक पांड्यालाही विश्रांती देण्यात येणार आहे.
संबंधित बातम्या